ᐃᓄᐃᑦ ᐊᕐᓀᑦ ᑲᑐᑦᔨᖃᑎᒌᓐᓂᖓ

ᐊᑐᕋᑦᓭᑦ

ᑐᓴᕐᑎᓯᐅᑎᕗᑦ

ᓴᑐᕐᕖᑯᑦ ᓄᐃᑦᓯᓯᒪᔪᑦ ᐊᒥᓱᐃᓂᒃ ᑐᓴᕐᑎᓯᐅᑎᓂᒃ ᐱᓯᒪᔪᓂᒃ ᐊᑑᑎᑎᕙᑦᑕᑎᓐᓂᑦ ᐊᒻᒪᓗ ᖃᐅᔨᓴᕐᓂᓂᑦ ᑲᔪᓯᑎᕙᑦᑕᑎᓐᓂᑦ. ᑖᒃᑯᐊ ᑕᑯᔭᑦᓴᖑᕐᑎᑕᐅᓯᒪᔪᑦ ᐃᓗᓕᖃᕐᓱᑎᒃ ᑭᖕᖒᒪᔭᖏᓐᓂᒃ ᐊᒻᒪᓗ ᐃᓱᒪᒋᔭᖏᓐᓂᒃ ᐃᓄᐃᑦ ᐊᕐᓀᑦ ᖃᓄᐃᓕᖕᖓᑕᐅᓂᖃᓗᑭᑉᐸᑐᑦ ᐱᖁᔭᑎᒍᑦ ᓈᒻᒪᓈᕐᕕᐅᖏᓐᓂᒧᑦ, ᐃᓓᓐᓈᑕᐅᓂᕐᓄᑦ, ᐊᒻᒪᓗ ᐱᒋᐊᖃᑦᑖᒍᓂᕐᒧᑦ ᐱᓗᐊᕐᑐᒥᒃ ᑐᑭᓯᔭᐅᒋᐊᓪᓚᕆᐊᓕᒻᒧᑦ ᐊᒻᒪᓗ ᖃᓄᐃᓕᒋᐊᕈᑕᐅᓗᓂ ᐃᓗᒡᒍᓯᑎᒍᑦ ᓈᒻᒪᑎᓗᒋᑦ ᖃᓄᐃᓕᒋᐊᕈᑕᐅᔪᑦ ᐃᓚᓕᒫᖏᑦᑕ ᖃᓄᐃᖕᖏᓯᐊᕐᓂᒧᑦ ᐃᑎᕈᓐᓇᓯᕕᒋᓚᕿᔭᖏᓐᓂ.

ᖃᐅᔨᒪᔭᐅᑦᓯᐊᑐᖅ ᑕᕐᕋᒥ ᓄᓇᓖᑦ, ᑌᒫᑦᓭᓇᖅ ᐊᓯᖏᑦᑎᑐᑦ ᓄᓇᖃᕐᖄᑐᕕᓃᑦ ᖁᒥᐅᓯᐊᒍᕕᖏᓐᓂ ᓄᓇᓂ, ᑳᓇᑕᒦᑦᑐᑦ ᐃᓚᒋᔭᐅᑦᓱᑎᒃ ᖃᓄᐃᓕᖕᖓᑕᐅᓲᒍᓂᕐᐹᓄᑦ ᖃᓄᓕᒫᖅ ᐃᓅᖃᑎᒌᓂ ᐱᓀᓗᑕᕐᓄᑦ. ᐊᕐᕌᒍᓂ ᑕᓪᓕᒪᐅᔪᕐᑑᓈᕐᑎᑐᓂ ᐊᒥᓱᓂ, ᖃᐅᔨᒪᑦᓴᐅᕙᑦᑐᑦ ᐅᓄᕐᓂᐹᒍᒋᐊᖏᑦ ᐃᒻᒥᓂᐊᔨᐊᕆᔭᐅᕙᑦᑐᑦ, ᐃᓕᓴᕐᓂᒥᒃ ᓄᕐᙯᓇᕐᐸᑐᑦ, ᐃᓚᒌᓂ ᐱᒋᐊᖃᑦᑖᒍᕙᑦᑐᑦ, ᐋᖓᔮᑦᑎᐅᕙᑦᑐᑦ, ᐊᒻᒪᓗ ᐊᓯᖏᑦ. ᑕᒪᓐᓇ ᓱᓕᔪᖅ ᐃᓱᒪᒋᒐᓱᐊᕆᐊᒥᒃ ᐱᔭᕐᓃᑐᖅ ᐊᒻᒪᓗ ᑲᒪᒋᒐᓱᐊᕆᐊᒥᒃ ᐱᔭᕐᓃᓗᐊᕐᒥᓱᓂ. ᖁᓇᖕᖏᑑᒐᓗᐊᖅ, ᐊᒥᓲᓗᐊᕐᑐᑦ ᑳᓇᑕᒥᐅᑦ ᐃᑉᐱᒍᓱᖕᖏᒪᑕ ᐅᓪᓗᒥ ᐱᐅᓯᐅᕙᓕᕐᑐᑦ ᑐᕃᓐᓇᑐᑎᒍᑦ ᐃᓕᖓᓂᖏᓐᓂᒃ ᖃᒻᒥᐅᓗᐊᖏᓐᓈᑐᒧᑦ ᐊᑑᑎᕐᖃᒥᐅᓗᐊᕐᓱᓂ ᖃᓪᓗᓈᑦ ᑎᐅᕐᖃᓂᕕᓂᖏᓐᓄᑦ; ᑐᑭᓯᒪᖕᖏᑐᑦ ᖃᓄ ᖃᓄᐃᓕᖕᙰᓯᒪᓚᕿᓐᓂᖓᓂᒃ ᐃᓕᒃᑰᑎᕐᑐᓂᒃ ᐃᓄᓐᓂᒃ ᐊᒻᒪᓗ ᐃᓚᒌᓂᒃ.

ᑖᒃᑯᐊ ᐊᑐᐊᒑᐲᑦ ᐃᕐᖃᑐᐃᕕᓕᕆᓂᕐᓄᑦ ᓄᓇᕕᒻᒥ ᓄᓇᓕᓐᓂ ᓄᐃᑕᐅᓯᒪᔪᑦ 2018-ᒥ. ᑐᕌᒐᖃᕐᓯᒪᔪᑦ ᒪᓂᔨᓂᕐᒥᒃ ᓯᕕᑑᒍᓂᕐᓴᓂᒃ ᑐᑭᓯᒪᐅᑎᑖᕐᑎᓯᒋᐊᕐᓂᒥᒃ ᐃᕐᖃᑐᐃᕕᓕᕆᓂᐅᑉ ᑐᑭᖓᓂᒃ ᓄᓇᕕᒻᒥ, ᒪᓂᔨᕕᒋᑦᓱᒋᑦ ᐃᓄᐃᑦ ᐃᓱᒪᒋᔭᖏᓐᓂᒃ ᐃᓅᖃᑎᒌᑦ ᓭᒪᐅᑎᓂᖏᓐᓄᑦ ᐊᒻᒪᓗ ᐊᑐᕋᑦᓴᓄᑦ ᐃᑲᔪᕐᓯᒍᑎᐅᓗᑎᒃ ᓈᒻᒪᒋᐅᑎᖕᖏᑐᓂᒃ ᐋᕐᕿᒍᑎᑦᓴᑖᕐᑎᓯᓂᕐᓄᑦ ᐃᓕᖓᔪᓄᑦ ᐃᕐᖃᑐᐃᕕᓕᕆᓂᐅᑉ ᐋᕐᕿᓱᕐᓯᒪᐅᑎᖏᓐᓂᒃ. ᐱᑦᔪᑎᖓ ᐃᓂᕐᑕᐅᓯᒪᓂᖏᑦᑕ ᐃᑲᔪᕐᓯᒋᐊᕐᓂᖅ ᐊᕐᓇᓂᒃ ᓄᐃᑎᕆᒋᐊᕐᑎᓗᒋᑦ ᐱᔪᓐᓇᓯᐊᕐᑐᕆᓂᕐᒥᒃ ᐃᒻᒥᓂᒃ ᐊᐅᓚᑦᓯᒍᑦᔨᒍᓐᓇᓱᑎᒃ ᐊᒻᒪᓗ ᓭᒪᖃᑎᙯᓐᓇᓚᕿᓗᑎᒃ ᐃᓚᒥᓂᒃ ᐊᒻᒪᓗ ᓄᓇᓕᒥᓂ.

ᑖᒃᑯᐊ ᑐᓴᕐᑎᓯᐅᑏᑦ ᑕᑯᑦᓴᐅᑎᑦᓯᔪᑦ ᖃᐅᔨᔭᐅᓚᕿᔪᕕᓂᕐᓂᒃ ᐱᓇᓱᒐᕐᒧᑦ ᐱᒋᐊᕐᑎᑕᐅᓯᒪᔪᒧᑦ ᓴᑐᕐᕖᑦ ᐃᓄᐃᑦ ᐊᕐᓀᑦ ᑲᑐᑦᔨᖃᑎᒌᓐᓂᖓᓄᑦ ᓄᓇᕕᒻᒥ ᑳᓇᑕᒥᐅᓕᒫᑦ ᐊᐅᓚᑦᔦᓂᖃᕆᐊᕐᑎᓗᒋᑦ ᑲᔪᓯᑎᑦᓯᓂᕐᒥᒃ ᑳᓇᑕᒥ ᖃᐅᔨᒋᐊᕐᓂᒥᒃ ᐊᓯᐅᖏᓐᓇᐸᑦᑐᓂᒃ ᐊᒻᒪᓗ ᐃᓄᐊᕐᑕᐅᕙᑦᑐᓂᒃ ᓄᓇᖃᕐᖄᑐᕕᓂᕐᓂᒃ ᐊᕐᓇᓂᒃ ᐊᒻᒪᓗ ᐸᓂᓐᓂᒃ ᑳᓇᑕᒥ.

ᓂᐱᑦᓴᔦᑦ ᓵᑦᑐᔮᓃᑦᑐᑦ

ᐊᑭᖃᕋᑎᒃ ᐊᑐᐃᓐᓀᑦ

ᓴᑐᕐᕖᑯᑦ 2-ᓂᒃ ᑕᑯᓐᓇᕋᑦᓴᓕᐅᕐᓯᒪᔪᑦ ᐱᓂᕐᓗᑎᑦᓯᑌᓕᓂᕐᓄᑦ ᐃᑲᔪᕐᓯᐅᑎᑦᓴᓂᒃ ᐊᑐᕐᑕᐅᒍᓐᓇᑐᓂᒃ ᐱᓂᕐᓗᑎᑦᓯᑌᓕᒍᑎᓄᑦ ᐅᕝᕙᓘᓐᓃᑦ ᒪᒥᓴᕐᓂᓄᑦ ᐱᓇᓱᐊᕐᑎᓯᔪᓄᑦ. ᐊᑕᐅᓯᖅ ᑕᑯᓐᓇᕋᑦᓴᖅ ᑲᒪᒋᔭᖃᕈᑕᐅᔪᖅ ᐃᓚᒌᓂ ᐱᒋᐊᖃᑦᑕᓂᕐᒧᑦ ᐃᕐᓯᓇᕿᓂᕐᓄᑦ ᐊᒻᒪᓗ ᐁᑉᐸᖓ ᑲᒪᒋᔭᖃᕈᑕᐅᑎᓪᓗᒍ ᐃᒥᐊᓗᑦᑎᐅᓂᕐᒥᒃ. ᑕᒪᖏᒃ ᑕᑯᓐᓇᕋᑦᓴᓕᐊᒍᓯᒪᔫᒃ ᑐᓴᕐᓴᐅᑎᑦᓯᔫᒃ ᐃᓄᓐᓂᒃ ᐊᕐᓇᓂᒃ ᐅᖃᐅᓯᖃᕐᑎᓗᒋᑦ ᓇᒻᒥᓂᖅ ᐊᑐᕐᓯᒪᔭᒥᓂᒃ, ᒪᒥᓴᕐᓂᒥᓄᑦ ᐱᕙᓪᓕᐊᒍᑎᒋᓯᒪᔭᒥᓂᒃ, ᐊᒻᒪᓗ ᐊᔪᖀᒋᐊᕈᑎᒥᓂᒃ ᐊᓯᒥᓂᒃ ᐊᕐᓇᓂᒃ ᖃᐅᔨᑎᑦᓯᐅᑎᒋᑦᓱᒋᑦ ᓯᕗᓂᕐᒥ ᓂᕆᐅᑦᓯᐊᓂᕐᓂᒃ ᐱᒍᓐᓇᕆᐊᖏᑦ ᐊᒻᒪᓗ ᐱᔪᑦᓴᐅᔮᕐᑎᓯᒋᐊᕈᑎᒋᑦᓱᒋᑦ ᐊᓯᒥᓂᒃ ᐊᕐᓇᓂᒃ ᓄᓇᓕᑦᑎᓂ ᐅᑎᕐᑎᑕᐅᑦᓯᐊᕈᓐᓇᓂᖏᓐᓂᒃ ᓄᓪᓚᖓᓐᓇᓂᐅᑉ ᐊᒻᒪᓗ ᖃᓄᐃᖕᖏᓯᐊᕐᓂᐅᑉ.

ᑎᑭᓭᓚᐅᕆᑦ ᐊᑭᖃᖕᖏᑐᓂᒃ ᑕᑯᓐᓇᕋᑦᓴᓂᒃ ᓵᑦᑐᔮᓃᑦᑐᓂᒃ

ᐱᑕᑦᓯᑐᕐᓗᒋᑦ ᐱᑕᑦᓯᑐᒉᑦ ᖃᕆᑕᐅᔭᒃᑯᑦ ᑕᑯᓐᓇᕋᑦᓴᑖᕈᒪᒍᕕᑦ ᐊᓪᓚᓯᒪᔪᕐᓂᐊᕕᒃᑯᑦ ᐱᓂᕐᓗᑌᓕᓂᕐᓄᐊᖓᔪᓂᒃ ᐅᕝᕙᓘᓐᓃᑦ ᐊᖕᖏᐊᖏᔭᕐᓂᓄᑦ ᒪᓕᒐᑦᓴᑕᓕᓐᓂᒃ.

ᓇᓪᓕᐊᓂᒃ ᑕᑯᓐᓇᕋᑦᓴᑖᕈᒪᕕᑦ?
ᐊᑐᐊᕐᓯᓯᒪᕕᑦ ᖃᕆᑕᐅᔭᒃᑯᑦ ᓄᐃᑕᐅᒍᓐᓇᑐᓂᒃ ᐊᑐᐊᒑᐱᓐᓂᒃ ᑕᑯᓐᓇᕋᑦᓴᓄᐊᖓᔪᓂᒃ?
ᓴᑐᕐᕖᑦ ᐃᓕᓐᓂᒃ ᐅᖄᕕᖃᓛᕐᑐᑦ ᐅᖄᒍᑎᒃᑯᑦ ᐅᕝᕙᓘᓐᓃᑦ ᖃᕆᑕᐅᔭᒃᑯᑦ ᐊᓪᓚᒍᑎᑎᒍᑦ ᑎᑭᓵᕐᓃᕕᑦ ᐊᐅᓪᓚᑎᑦᓯᓚᐅᕋᓂ.
ᐊᓪᓚᓗᒋᑦ ᓇᓂᔭᐅᒍᑎᓐᓃᕕᑦ ᖃᕆᑕᐅᔭᒃᑯᑦ ᐅᕝᕙᓘᓐᓃᑦ ᐅᖄᒍᑎᒃᑯᑦ ᐃᓕᓐᓄᑦ ᐅᖄᒋᐊᖃᑦᓴᕈᑦᑕ.

ᓄᓇᓕᓐᓂ

ᐱᓇᓱᒉᑦ ᑮᓇᐅᔭᖃᕐᑎᑕᐅᒍᑎᖏᑦ

2011-ᒥᓂᑦ, ᓴᑐᕐᕖᑯᑦ ᐊᑐᐃᓐᓇᖑᕐᑎᓯᓯᒪᓲᑦ $3,000-ᓂᒃ ᐃᓘᓐᓀᓄᑦ ᓄᓇᕕᒻᒥ ᓄᓇᓕᓐᓄᑦ, ᐃᓚᐅᑎᓪᓗᒋᑦ ᐃᓄᐃᑦ ᑲᑎᒪᕕᒋᓲᖏᑦ ᑯᐯᑉ ᓯᖁᓂᖓᓂ, ᐱᓇᓱᐊᕐᑕᐅᒍᑎᒋᓂᐊᕐᑕᖏᓐᓂᒃ ᐊᕐᓀᑦ ᐃᓅᓯᖏᓐᓂᒃ ᐱᐅᓯᐅᒥᑎᑦᓯᒍᑎᑦᓴᓂᒃ. ᐱᓇᓱᒉᑦ ᑐᕌᖓᒍᓐᓇᑐᑦ ᐱᓇᓱᐊᕐᑕᐅᓚᖓᔪᓄᑦ ᐃᑉᐱᒍᓱᓕᕐᑎᓯᒋᐊᕐᓂᐅᓗᑎᒃ, ᐱᕙᓪᓖᒋᐊᕈᑎᑦᓴᓄᑦ ᓈᒻᒪᖁᐊᕇᓐᓂᖏᓐᓂᒃ ᐊᖑᑏᑦ ᐊᒻᒪᓗ ᐊᕐᓀᑦ, ᑲᔪᖏᕐᑐᐃᒍᑎᑦᓴᓄᑦ ᐃᓗᓯᕐᓱᓇᕐᑐᓂᒃ ᐃᓅᓯᖃᕆᐊᖃᕐᓂᓄᑦ, ᐅᕝᕙᓘᓐᓃᑦ ᐊᓯᖏᓐᓄᑦ ᓈᒻᒪᑐᓂᒃ ᐱᑦᔪᑎᓕᓐᓄᑦ ᐊᐅᓚᑦᔭᑕᐅᒋᐊᕈᒪᔪᓄᑦ. ᓄᓇᕕᒻᒥᐅᑦ ᐊᕐᓀᑦ ᐊᒻᒪᓗ ᐸᓃᑦ ᐱᒋᐊᕐᑎᓯᓯᒪᔪᑦ ᐊᒻᒪᓗ ᐃᓚᐅᕕᖃᕐᐸᓱᑎᒃ ᐊᒥᓱᐃᓂ ᐃᓕᓐᓂᐊᑎᑦᓯᓂᕐᓄᑦ ᓴᐳᑦᔭᐅᔪᓂ ᓴᑐᕐᕖᑯᓐᓄᑦ. ᐱᓇᓱᐊᕐᑌᑦ ᐱᕙᓪᓖᒋᐊᕈᑕᐅᓲᑦ ᐅᑭᐅᖃᖃᑎᒌᖕᖏᑐᑦ ᓱᖃᑦᓯᖃᑎᒌᓐᓂᖏᓐᓂᒃ ᐆᑦᑑᑎᒋᑦᓱᒋᑦ ᒥᕐᓱᓂᕐᓂᒃ ᐃᓕᓐᓂᐊᑎᑦᓯᓃᑦ ᐱᖁᓯᐅᕐᓃᑦ ᐊᒻᒪᓗ ᓇᑦᓯᔭᓂᒃ ᑲᒻᒥᐅᓃᑦ, ᐊᒻᒪᓗ ᐅᕕᒃᑫᑦ ᐊᐅᓪᓛᓯᒪᕕᒻᒦᑎᑕᐅᑦᓱᑎᒃ ᐊᒻᒪᓗ ᐅᖄᖃᑎᒌᒍᑎᖃᖃᑦᑕᓱᑎᒃ ᓴᐳᑦᔭᐅᓂᖃᕐᓱᑎᒃ ᐃᓕᖓᔪᓄᑦ ᐱᓀᓗᑕᕐᓄᑦ ᓱᓇᐅᑦᓴᖏᒻᒧᑦ ᐃᕐᓯᓇᕿᕕᐅᓂᕐᓄᑦ, ᐃᒻᒥᓂᐊᕐᑎᓯᑦᑌᓕᓂᕐᓄᑦ, ᐊᒻᒪᓗ ᐁᑉᐸᕇᑦᓯᐊᕈᑎᓂᒃ ᓄᐃᑎᕆᓂᕐᓄᑦ. ᓴᑐᕐᕖᑯᑦ ᑫᓪᓗᑐᐃᕙᑦᑐᑦ ᐊᕐᓇᓂᒃ ᓄᐃᑎᕆᖁᑦᓱᒋᑦ ᓄᑖᓂ ᐱᓇᓱᒐᕐᓂᒃ, ᓱᖃᑦᓯᑎᑦᓯᐅᑎᓂᒃ, ᐊᒻᒪᓗ ᐃᓕᓐᓂᐊᑎᑦᓯᓂᕐᓄᑦ ᓴᐳᑦᔨᐅᑎᐅᓚᖓᔪᓂᒃ ᖃᓄᐃᖕᖏᓯᓂᐊᕐᓂᖏᓐᓂᒃ ᐊᕐᓀᑦ, ᐸᓃᒃ, ᐊᒻᒪᓗ ᓄᓇᓖᑦ. ᓴᑐᕐᕖᑯᑦ ᑫᓪᓗᑐᐃᕙᑦᑐᑦ ᐊᕐᓇᓂᒃ ᓄᐃᑎᕆᖁᑦᓱᒋᑦ ᓄᑖᓂ ᐱᓇᓱᒐᕐᓂᒃ, ᓱᖃᑦᓯᑎᑦᓯᐅᑎᓂᒃ, ᐊᒻᒪᓗ ᐃᓕᓐᓂᐊᑎᑦᓯᓂᕐᓄᑦ ᓴᐳᑦᔨᐅᑎᐅᓚᖓᔪᓂᒃ ᖃᓄᐃᖕᖏᓯᓂᐊᕐᓂᖏᓐᓂᒃ ᐊᕐᓀᑦ, ᐸᓃᒃ, ᐊᒻᒪᓗ ᓄᓇᓖᑦ.

ᑐᑦᓯᕋᐅᑕᐅᒍᓐᓇᑐᑦ ᓄᓇᓕᓐᓂ ᐱᓇᓱᒐᕐᓄᑦ ᑮᓇᐅᔭᖃᕐᑎᓯᐅᑎᓄᑦ ᐱᓇᓱᐊᕈᑦᔨᕕᒻᒥ, ᐱᑕᑦᓯᑐᕐᑕᐅᓗᑎᒃ ᐱᑕᑦᓯᑐᒉᑦ ᐊᒻᒪᓗ ᑐᔫᑎᒋᓗᒋᑦ ᓱᑲᑦᑐᑰᕐᑎᓯᐅᑎᒃᑯᑦ ᐅᕗᖓ (819 988 2168) ᐅᕝᕙᓘᓐᓃᑦ ᖃᕆᑕᐅᔭᒃᑯᑦ (info@saturviit.ca). ᐱᓇᓱᐊᕐᑕᐅᓯᒪᔪᓂᒃ ᑐᓴᕐᑎᓯᐅᑏᑦ ᓂᕆᐅᒋᔭᐅᓛᕐᑐᑦ ᐱᓇᓱᒐᐅᑉ ᐃᓱᐊᓂ. ᐱᑕᑦᓯᑐᕐᕕᓴᖅ ᖃᕆᑕᐅᔭᒃᑯᑦ ᓄᐃᑎᓗᒍ The form can be downloaded as well.