ᐃᕐᖃᑐᐃᕕᑎᒍᑦ ᓈᒻᒪᓯᐊᕐᑐᓂᒃ ᑐᑭᑖᕈᑦᔭᐅᓂᖅ ᐊᕐᓇᓄᑦ ᐊᒻᒪᓗ ᐃᓚᒌᓄᑦ ᓄᓇᕕᒻᒥ ᐃᓱᒫᓘᑕᐅᓪᓚᕆᓯᒪᓕᕐᑐᖅ ᓴᑐᕐᕖᑯᓐᓄᑦ. ᐱᒋᐊᕐᑕᐅᓚᐅᔪᑎᓪᓗᒍ ᑳᓇᑕᒥ ᓇᓂᓕᒫᖅ ᖃᐅᔨᒐᓱᐊᕐᓂᖅ ᐃᓄᐊᕐᑕᐅᕙᑦᑐᓂᒃ ᐊᒻᒪᓗ ᐊᓯᐅᖏᓐᓇᐸᑦᑐᓂᒃ ᓄᓇᖃᕐᖄᑐᕕᓂᕐᓂᒃ ᐊᕐᓇᓂᒃ ᐊᒻᒪᓗ ᑲᒃᑲᓛᓂ, ᓴᑐᕐᕖᑯᑦ ᐱᒋᐊᕐᑎᓯᓯᒪᔪᑦ ᐊᒥᓱᐃᓂᒃ ᑲᒪᒋᔭᖃᕈᑎᓂᒃ, ᖃᓄᐃᓕᒋᐊᕈᑎᓂᒃ ᐊᒻᒪᓗ ᓴᓇᕐᕈᑎᓂᒃ ᐃᓕᖓᓪᓚᕆᑦᑐᓂᒃ ᓄᓇᕕᒻᒧᑦ ᐃᓱᐃᓪᓕᖓᐅᑎᐅᓲᓄᑦ ᐃᕐᖃᑐᐃᕕᓕᕆᓂᕐᓂ, ᐃᕐᓯᓇᕿᕝᕕᖃᕐᓂᓄᑦ ᐱᒋᐊᖃᑦᑕᓂᕐᓄᑦ, ᐊᒻᒪᓗ ᑐᖁᑕᐅᕙᑦᑐᓄᑦ ᐊᓯᐅᖏᓐᓇᐸᑦᑐᓄᓪᓗ ᓄᓇᕕᒻᒥᐅᓄᑦ.
2016-ᒥ, ᐱᕉᑕᕆᑎᓪᓗᒋᑦ ᑳᓇᑕᓕᒫᒥ ᐱᓇᓱᐊᕈᑕᐅᓂᖏᑦ ᖃᐅᔨᒐᓱᐊᕐᓃᑦ ᐊᓯᐅᖏᓐᓇᐸᑦᑐᓂᒃ ᐊᒻᒪᓗ ᐃᓄᐊᕐᑕᐅᕙᑦᑐᓂᒃ ᓄᓇᖃᕐᖄᑐᕕᓂᕐᓂᒃ ᐊᕐᓇᓂᒃ ᐊᒻᒪᓗ ᐸᓂᓐᓂᒃ, ᓴᑐᕐᕖᑯᑦ ᐱᒋᐊᕐᑎᓯᓯᒪᔪᑦ ᓄᓇᓕᓕᒫᓄᐊᖓᔪᒥᒃ ᐱᓇᓱᒐᕐᒥᒃ ᓇᓗᓀᕐᓯᐅᑎᓕᐊᕆᑦᓱᒋᑦ ᖃᓄᐃᓕᖓᓪᓚᕆᓐᓂᖏᑦ ᐊᓯᐅᖏᓐᓇᐸᑦᑐᑦ ᐊᒻᒪᓗ ᐃᓄᐊᕐᑕᐅᕙᑦᑐᑦ ᓄᓇᕕᒻᒥᐅᑦ (MMN), ᓂᐱᖃᕐᑎᑕᐅᑎᓗᒋᑦ ᐊᓯᐅᓯᒪᔪᑦ ᐃᓄᐊᕐᑕᐅᓯᒪᔪᓪᓗ ᐃᓚᖏᑦ ᐊᒻᒪᓗ ᑖᒃᑯᐊ ᑭᖕᖒᒪᔭᖏᑦ ᖃᐅᔨᒋᐊᕐᓱᒋᑦ.
ᐅᓪᓗᑐᕐᑐᒥᒃ 5-ᓂᒃ ᐊᓯᐅᖏᓐᓇᔨᐊᖃᕐᓯᒪᔪᑦ ᐃᓄᐊᕐᑕᐅᔨᐊᖃᕐᓯᒪᔪᑦ ᐃᓚᖏᑦ ᑲᑎᒪᑎᑕᐅᓚᐅᕐᓯᒪᔪᑦ ᐃᓄᑦᔪᐊᑉ ᒪᙯᕝᕕᖓᓂ ᐁᐸᔭᓕ 2016-ᒥ. 18 ᐃᓚᒋᔦᑦ ᐊᒻᒪᓗ 9 ᓄᓇᓕᓕᒫᓂ ᑭᒡᒐᑐᕐᑏᑦ ᑖᑦᓱᒧᖑ ᐃᓚᐅᓚᐅᕐᓯᒪᔪᑦ.
ᑖᑦᓱᒪ ᑭᖑᓂᖓᒍᑦ, ᑕᓪᓕᒪᐅᔪᖕᖏᒐᕐᑐᑦ ᐅᖄᒍᑎᒃᑯᑦ ᐊᐱᕐᓲᔭᕐᑕᐅᓚᐅᕐᓯᒪᔪᑦ ᐃᓚᒋᑦᓱᒋᑦ ᐳᓖᓰᑦ, ᐃᕐᖃᑐᐃᕕᓕᕆᓂᕐᓂ ᑲᔪᓯᑎᑦᓯᔨ, ᐃᓅᓯᓕᕆᔨᒃᑯᑦ ᐱᓇᓱᑦᑎᖏᑦ ᐊᒻᒪᓗ ᐊᓯᖏᑦ ᐱᒻᒪᕇᑦ ᐱᓇᓱᑦᑎᒪᕇᑦ ᑐᑭᓯᑦᓯᐊᖃᑎᒌᒋᐊᕐᓱᑎᒃ ᑖᑦᓱᒥᖓ ᐱᓀᓗᑕᕐᒥᒃ ᓄᓇᕕᒻᒥ. ᑐᓴᕐᑎᓯᐅᑏᑦ ᐊᒻᒪᓗ ᓀᓪᓕᑎᕐᓯᒪᔪᑦ ᖃᓄᐃᓕᖓᓂᖏᓄᑦ ᖃᐅᔨᒐᓱᐊᕐᓂᐅᑉ ᐊᓯᐅᖏᓐᓇᐸᑦᑐᑦ ᐊᒻᒪᓗ ᐃᓄᐊᕐᑕᐅᕙᑦᑐᑦ ᓄᓇᕕᒻᒥᐅᑦ ᐃᓄᐃᑦ ᑕᑯᔭᑦᓴᖑᕐᑎᑕᐅᓚᐅᕐᓯᒪᔪᑦ 2017-ᒥ.
2017 ᐅᑭᐊᒥ, ᓴᑐᕐᕖ ᑲᔪᓯᑎᑦᓯᓚᐅᕐᓯᒪᔪᑦ ᖃᓄᕐᑑᕈᑎᖃᕐᓂᒥᒃ ᐃᕐᖃᑐᐃᕕᓕᕆᓂᕐᓄᑦ ᑰᑦᔪᐊᒥ ᑐᓴᕐᑎᓯᑦᓱᑎᒃ ᐊᕐᓀᑦ ᐊᒻᒪᓗ ᑲᒃᑲᓛᑦ ᐊᓯᐅᖏᓐᓇᐸᓐᓂᖏᓐᓄᑦ ᐊᒻᒪᓗ ᐃᓄᐊᕐᑕᐅᕙᓐᓂᖏᓐᓄᑦ ᓄᓇᓕᓕᒫᓂ ᑭᒡᒐᑐᕐᑎᓂᒃ ᐊᒻᒪᓗ ᐃᕐᖃᑐᐃᕕᓐᓄᐊᖓᔪᓂᒃ ᑭᒡᒐᑐᕈᑎᖃᕐᓂᓂᒃ ᒪᓂᔨᓯᒪᔨᓂᒃ. ᑕᕝᕙᓂ ᑲᑎᒪᓂᕐᒥ, ᐅᖃᐅᓯᕆᔭᐅᓚᐅᑯᑦᑎᓗᒋᑦ ᐃᕐᖃᑐᐃᕕᓕᕆᓂᐅᑉ ᐋᕐᕿᓱᕐᓯᒪᐅᑎᖏᑦ ᐊᒻᒪᓗ ᐃᕐᖃᑐᐃᕕᓕᕆᓂᕐᓄᐊᖓᔪᑦ ᑭᒡᒐᑐᕈᑏᑦ, ᐃᓚᐅᔪᑦ ᖃᓄᐃᓕᒋᐊᕈᑎᑦᓴᓚᕆᓐᓂᒃ ᐅᖃᐅᓯᖃᕈᓐᓇᓚᐅᔫᑦ ᐃᓱᒫᓘᑕᐅᔪᓄᑦ ᐊᒻᒪᓗ ᑭᖕᖒᒪᓇᕐᑐᓄᑦ ᐱᖁᔭᕐᓂᒃ ᓯᖁᒥᑦᓯᔪᓄᑦ ᐱᓂᕐᓗᕕᐅᕙᑦᑐᓄᑦ ᐊᒻᒪᓗ ᐃᓚᖏᓐᓄᑦ.
ᓴᑐᕐᕖᑯᑦ ᐱᕙᓪᓕᑎᑦᓯᒋᐊᕐᓂᖓ ᑖᑦᓱᒥᖓ ᐃᕐᖃᑐᐃᕕᓕᕆᓂᕐᓄᑦ ᐊᐅᓚᑦᔦᒋᐊᕈᑎᒥᒃ ᓄᓇᒥᕕᒻᒥ ᓄᓇᓕᓐᓂ, ᓄᓇᕕᒻᒥ ᓄᓇᓕᓕᒫᓂ ᑎᒥᓂᒃ ᐊᒻᒪᓗ ᑯᐯᑉ ᑲᕙᒪᑐᖃᐅᓪᓗ ᑲᕙᒪᖏᓐᓂᒃ. ᑭᓇᓕᒫᒃᑯᑦ, ᓇᓂᑐᐃᓐᓈᑐᑦ ᐳᕐᑐᓕᕇᕝᕕᓂ, ᑐᓂᕐᕈᓯᐅᑎᖃᕆᐊᓖᑦ ᑖᒃᑯᐊ ᐊᐅᓚᑦᔭᑕᐅᖁᓪᓗᒋᑦ.
ᓄᑖᑦ 2018-ᒥ ᓄᐃᑕᐅᓯᒪᔪᑦ ᓴᑐᕐᕖᒧᑦ, ᓄᓇᕕᒻᒥ ᓄᓇᓕᓐᓂ ᐃᕐᖃᑐᐃᕕᓕᕆᓂᖅ, ᐃᓕᖓᒻᒥᔪᑦ ᓴᓇᕐᕈᑎᑖᕐᑕᐅᒋᐊᖃᕐᓂᖏᓐᓄᑦ ᐊᒻᒪᓗ ᐃᑲᔪᕐᑕᐅᒍᑎᑦᓴᖏᑦ ᐊᕐᓀᑦ ᐃᓄᐃᑦ ᓄᐃᓗᒍᑦ ᑐᑭᓯᒪᑦᓯᐊᓂᕐᓴᐅᓂᐊᕐᒪᑕ ᐃᕐᖃᑐᐃᕕᓕᕆᓂᐅᑉ ᐋᕐᕿᓱᕐᓯᒪᐅᑎᖏᓐᓂᒃ ᐊᒻᒪᓗ ᐃᓅᖃᑎᒌᑦ ᓭᒪᐅᑎᓂᕐᓴᐅᓂᐊᕐᒪᑕ ᐃᓄᐃᑦ ᓄᓇᓕᖏᓐᓂ.
