ᑭᓇᒃᑰᒪᖔᑦᑕ
ᓴᑐᕐᕖᑦ ᐃᓄᐃᑦ ᐊᕐᓀᑦ ᑲᑐᑦᔨᖃᑎᒌᓐᓂᖓ ᓄᓇᕕᒻᒥ ᑭᒡᒐᑐᕐᑐᖅ ᐃᓘᓐᓀᓂᒃ ᐃᓄᓐᓂᒃ ᐊᕐᓇᓂᒃ ᓄᓇᕕᒻᒥ ᐅᑭᐅᓕᓐᓂᒃ 16-ᓂᒃ ᐅᖓᑖᓄᓪᓗ ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᒧᑦ ᐃᓚᐅᔪᓂᒃ. ᓄᓇᓕᓕᒫᓄᐊᖓᑦᓱᓂ ᖄᖏᕐᓂᑯᓕᐅᕐᑎᐅᒐᓂ ᑎᒥᐅᓂᕐᒥᓄᑦ, ᓴᑐᕐᕖᑦ ᐱᒐᓱᐊᕈᑎᖃᓲᖅ ᓂᐱᖃᕐᑎᓯᒋᐊᖃᕐᓂᒥᓂᒃ ᓄᓇᕕᒻᒥᐅᓂᒃ ᐊᕐᓇᓂᒃ ᐊᒻᒪᓗ ᑭᒡᒐᑐᕈᑎᒋᓗᒋᑦ ᖃᓄᐃᖕᖏᓯᐊᕆᐊᖃᕐᓂᖏᑦ ᐊᒻᒪᓗ ᑲᒪᒋᔭᐅᖁᔭᖏᑦ. ᓴᑐᕐᕖᑦ ᑭᒡᒐᑐᕐᓂᖃᕈᒪᓂᕐᒥᓄᑦ ᑐᓴᐅᒪᑎᑦᓯᒋᐊᓲᑦ ᓄᓇᕕᒻᒥ 14-ᓂ ᓄᓇᓕᓐᓂ ᐊᒻᒪᓗ ᐃᓄᓐᓂᒃ ᐊᕐᓇᓂᒃ ᖃᓪᓗᓈᑦ ᓄᓇᖓᓄᑦ ᓅᑦᓯᒪᔪᓂᒃ. ᑲᑎᒪᔨᖃᕐᑐᒍᑦ ᑭᒡᒐᑐᕐᑎᓂᒃ ᓄᓇᓕᓕᒫᓂ ᓄᓇᕕᒻᒥ ᐊᑦᔨᒌᖕᖏᑐᓂ.
2005 ᐊᐅᔭᖓᓂ, ᐃᓄᐃᑦ ᐊᕐᓀᑦ ᐃᓘᓐᓀᓂ ᓄᓇᕕᒻᒥ ᓄᓇᓕᓐᓂ ᐱᓯᒪᔪᑦ ᐊᒻᒪᓗ ᖃᓪᓗᓈᑦ ᓄᓇᖓᓂ ᑲᑎᓚᐅᕐᓯᒪᔪᑦ ᕿᓚᓗᒐᖅ ᐊᐅᓪᓛᓯᒪᕕᒻᒥ ᐳᕕᕐᓂᑑᑉ ᓴᓂᐊᓂ, ᑖᕙᓃᑦᓱᑎᒃ ᐅᖃᐅᓯᖃᓚᐅᕐᓯᒪᔪᑦ ᐃᓱᐃᓪᓕᖓᐅᑎᐅᕙᑦᑐᓂᒃ ᐃᓱᒪᒋᔭᒥᓂᒃ ᐱᒻᒪᕆᐅᒋᐊᖏᑦ ᓄᓇᓕᒥᓄᑦ: ᕿᑐᕐᖓᒥᓂᒃ ᐱᕈᕐᓭᓂᖅ, ᑲᒃᑲᓛᑦ ᑲᒪᒃᑭᓗᑦᑕᐅᓂᖏᑦ, ᐃᒻᒥᓂᐊᕐᓂᖅ, ᐃᓕᓴᕐᓂᖅ, ᐅᖃᐅᓯᖅ, ᒪᒥᓴᕐᓂᖅ, ᐊᒻᒪᓗ ᐅᖃᐅᓯᒃᑯᑦ ᑎᒥᒃᑯᓗ ᐋᓐᓂᑎᕆᓂᖅ. ᓄᐃᑕᐅᖁᔨᓕᓚᐅᕐᓯᒪᔪᑦ ᐊᕐᓀᑦ ᑲᑐᑦᔨᖃᑎᒌᓐᓂᖓᓂᒃ ᓲᖑᓯᑎᑦᓯᓚᖓᔪᒥᒃ ᓄᓇᕕᒻᒥᐅᑦ ᐊᕐᓀᑦ ᓂᐱᖏᓐᓂᒃ. ᓴᑐᕐᕖᑦ, ᐃᓄᐃᑦ ᐊᕐᓀᑦ ᑲᑐᑦᔨᖃᑎᒌᓐᓂᖓ ᓄᓇᕕᒻᒥ ᓄᐃᑕᐅᓚᐅᕐᓯᒪᔪᖅ 2006-ᒥ ᑎᓕᔭᐅᒍᑎᖃᕐᓱᓂ ᐊᕐᓀᑦ ᓄᓇᕕᒻᒥ ᑲᒪᒋᔭᐅᖁᓲᖏᓐᓂᒃ. ᓴᑐᕐᕖᑦ ᐱᓇᓱᐊᕈᑦᔨᐅᑎᒋᓚᖓᔭᖓᑕ ᐃᓚᒋᓚᐅᕐᓯᒪᔭᖓ ᐃᕐᓯᓇᕿᕝᕕᖃᕐᓂᓂᒃ ᐱᒋᐊᖃᑦᑖᖃᕐᓂᓂᒃ ᓄᕐᖃᑎᑦᓯᓂᖅ.
ᑎᒥᖁᑎᕗᑦ ᑫᓪᓗᑐᐃᓲᑦ ᐊᕐᓇᓂᒃ ᓈᒻᒪᑐᓂᒃ ᐊᐅᓚᑦᔦᒋᐊᕈᑎᖃᖁᑦᓱᒋᑦ ᐱᐅᓯᐅᒥᑎᑦᓯᒋᐊᕈᑎᒋᓂᐊᕐᑕᒥᓂᒃ ᓇᒻᒥᓂᖅ ᐃᓅᖃᑎᒌᓐᓂᓂ ᐊᒻᒪᓗ ᒪᑭᑕᒐᓱᐊᕐᓂᓂ ᖃᓄᐃᖕᖏᓯᐊᕈᑎᒋᓯᐊᕐᑕᖏᓐᓂᒃ. ᐱᕙᓪᓖᒋᐊᕐᑎᐅᓱᓂ ᓄᓇᓕᓕᒫᓂ ᐊᒻᒪᓗ ᐳᔮᕓᓐᓯᒥ ᐱᓇᓱᐊᕈᑦᔨᐅᑎᓂᒃ ᐊᒻᒪᓗ ᑭᒡᒐᑐᕈᑎᓂᒃ ᐱᕙᓪᓖᒋᐊᕐᑎᓯᐅᑎᐅᓚᖓᔪᓂᒃ ᖃᓄᐃᖕᖏᓯᐊᕐᑐᓂᒃ ᐃᓗᓯᕐᓱᓯᐊᕐᑐᓂᒃ ᐊᕐᓇᓂᒃ, ᑲᒃᑲᓛᓂᒃ, ᐊᒻᒪᓗ ᐃᓚᒌᓂᒃ.
ᓴᑐᕐᕖᑦ ᑮᓇᐅᔭᖃᕐᑎᓯᓲᑦ ᐃᑲᔪᕐᓯᒪᓲᒍᑦᓱᑎᓪᓗ ᓄᓇᓕᓐᓂ ᐊᕐᓀᑦ ᐃᓚᒌᕝᕕᖏᓐᓂᒃ ᑲᔪᓯᑎᑦᓯᓚᖓᔪᓂᒃ ᓄᓇᓕᓐᓂ ᐱᓇᓱᒐᕐᓂᒃ ᐊᒻᒪᓗ ᓱᖃᑦᓯᑎᑦᓯᐅᑎᓂᒃ. ᑲᔪᓯᑎᑦᓯᓲᑦ ᓄᓇᓕᓕᒫᓂ ᐱᓇᓱᐊᕐᑕᐅᒍᒪᔪᓂᒃ ᐊᒻᒪᓗ ᓱᖃᑦᓯᐅᑕᐅᔪᓂᒃ ᐃᓄᐃᑦ ᐊᕐᓀᑦ ᐃᓱᒫᓘᒋᔭᖏᓐᓄᑦ ᐊᒻᒪᓗ ᑲᒪᒋᒍᒪᔭᖏᓐᓄᑦ. ᓴᑐᕐᕖᑦ ᑭᒡᒐᑐᓲᒍᒻᒥᔪᑦ ᓄᓇᕕᒻᒥ ᐊᕐᓇᓂᒃ ᐊᔪᖀᒋᐊᕐᑎᐅᓂᕐᒥᓄᑦ ᐱᓇᓱᐊᕈᑎᖃᕐᓱᑎᒃ ᓄᓇᓕᓕᒫᓂ, ᑳᓇᑕᒥ ᐊᒻᒪᓗ ᓯᓚᕐᔪᐊᒥ ᑲᒪᒋᔭᐅᓕᑐᐃᓐᓇᑐᓂᒃ.
ᑎᓕᔭᐅᒪᓂᕗᑦ
ᓴᑐᕐᕖᑦ ᐃᓄᐃᑦ ᐊᕐᓀᑦ ᑲᑐᑦᔨᖃᑎᒌᓐᓂᖓ ᓄᓇᕕᒻᒥ ᐊᒻᓗ ᖄᖏᕐᓂᑯᓕᐅᕐᑎᐅᒐᓂ ᑎᒥᐅᑦᓱᓂ ᑭᒡᒐᑐᕐᑐᖅ ᐃᓘᓐᓀᓂᒃ ᐃᓄᓐᓂᒃ ᐊᕐᓇᓂᒃ ᐅᑭᐅᓕᓐᓂᒃ 16-ᓂᒃ ᐅᖓᑖᓄᓗ. ᑎᓕᔭᐅᒪᒍᑎᓕᒃ ᓂᐱᖃᕐᑎᓯᔨᐅᓚᖓᑎᓪᓗᒍ ᐃᓄᓐᓂᒃ ᐊᕐᓇᓂᒃ ᓄᓇᕕᒻᒥᐅᓂᒃ, ᓴᑐᕕᕐᕖᑦ ᐅᑯᐊ ᐱᒐᓱᐊᒐᖏᑦ:
- ᓴᐳᑦᔨᓗᒋᑦ ᓄᓇᓕᓐᓂ ᐱᓇᓱᒉᑦ ᐱᕙᓪᓕᐊᖁᑎᒋᓂᐊᕐᑕᖏᑦ ᐊᕐᓀᑦ.
- ᓄᐃᑎᕐᐸᓗᒋᑦ ᐱᓇᓱᕋᑦᓭᑦ ᓱᖃᑦᓯᑎᑦᓯᐅᑎᑦᓭᑦ ᐃᑯᓪᓚᐅᒥᑎᑦᓯᒍᑎᐅᓚᖓᔪᑦ ᐱᓗᑲᑦᑕᐅᕙᓐᓂᖏᓐᓂᒃ ᐱᒋᐊᖃᑦᑖᒍᕙᓐᓂᖏᓐᓂᓪ ᐊᕐᓀᑦ ᐊᒻᒪᓗ ᑲᒃᑲᓛᑦ ᐊᒻᒪᓗ ᑕᒪᒃᑯᐊ ᖃᓄᐃᓐᖏᓯᐊᕐᓂᖏᑦ ᐱᕙᓪᓕᑎᒋᐊᕐᐸᓗᒋᑦ.
- ᓴᓇᕐᕈᑎᖃᕐᑎᐸᓪᓗᒋᑦ ᐃᑲᔪᕐᓯᐅᑎᒋᓚᖓᔭᖏᓐᓂᒃ ᐊᕐᓀᑦ ᐃᒻᒥᓂᒃ ᐱᒐᓱᐊᕈᑎᖃᕐᑎᓗᒋᑦ ᐃᓕᒍᒪᓂᕐᒥᓄᑦ ᐱᓂᐊᕐᓂᓕᕆᔪᓄᑦ, ᒪᑭᑕᒐᓱᐊᕈᑎᑦᓴᓕᐅᕐᓂᓄᑦ ᐅᕝᕙᓘᓐᓃᑦ ᐃᓅᖃᑎᖃᑦᓯᐊᓂᕐᒥᑎᒍᑦ ᓴᐳᑦᔭᐅᒍᑎᖏᑦ.
- ᐱᕙᓪᓕᐊᑎᒋᐊᕐᐸᓗᒋᑦ ᐊᕐᓀᑦ ᐊᒻᒪᓗ ᑲᒃᑲᓛᑦ ᓄᓇᕕᒻᒥᐅᑦ.
- ᑭᒡᒐᑐᕐᐸᓗᒋᑦ ᐃᓄᐃᑦ ᐊᕐᓀᑦ ᓄᓇᕕᒻᒥᐅᑦ ᑲᑎᒪᔪᓂ ᓄᓇᓕᒻᒥ, ᑯᐸᒻᒥ ᐊᒻᒪᓗ ᓄᓇᓕᓕᒫᓂ.
ᑲᑎᒪᔩᑦ
ᓴᑐᕐᕖᑦ ᑲᑎᒪᔨᖏᑦ 8. ᑭᒡᒐᑐᕐᑐᑦ ᐊᕐᓇᓂᒃ ᐱᖓᓱᐃᓂ ᓄᓇᓕᓕᒫᖏᓐᓂ ᓄᓇᕕᐅᑉ (ᑕᓯᐅᔭᕐᔪᐊᖅ, ᐅᖓᕙ ᐊᒻᒪᓗ ᓄᕗᒃ) ᐊᒻᒪᓗ ᐃᓄᓐᓂᒃ ᐊᕐᓇᓂᒃ ᒪᓐᑐᔨᐊᓚᒥᐅᓂᒃ.
- ᐋᓂ ᐊᕐᓇᑐᖅ, ᐊᖓᔪᕐᖄᖅ
- ᑲᐅᑦᔭᒃ ᐸᓪᓚᔮᑦ, ᐊᖓᔪᕐᖄᑉ ᑐᖓᓕᐊ
- ᑐᔩᓇ ᖁᒫᓗᒃ, ᐊᖓᔪᕐᖄᑉ ᑐᖓᓕᐊᑕ ᑐᖓᓕᓕᕐᕿᖓ
- ᕖᐱ ᐱᐊᑦᓕ, ᑮᓇᐅᔭᓕᕆᔨ
- ᔨᐊᓯᑲ ᑑᒪ, ᐊᓪᓚᑎᒻᒪᕆᒃ
- ᒫᑯᓚ ᑕᕐᕿᐊᐱᒃ, ᑲᑎᒪᔨ
- ᓕᓯ ᑲᓪᕕᓐ, ᑲᑎᒪᔨ
- ᐋᓂ ᑎᕐᑎᓗᒃ, ᑲᑎᒪᔨ
ᐊᕐᕌᒍᑕᒫᑦ ᑐᓴᕐᑎᓯᐅᑏᑦ
ᑐᓴᕐᑎᓯᐅᑏᑦ
ᓴᑐᕐᕖᑯᑦ ᓄᐃᑦᓯᓯᒪᔪᑦ ᐊᒥᓱᐃᓂᒃ ᑐᓴᕐᑎᓯᐅᑎᓂᒃ ᐱᓯᒪᔪᓂᒃ ᓱᖃᑦᓯᑎᑦᓯᐅᑎᒋᓯᒪᔭᕐᑎᓂ ᐱᓇᓱᐊᕐᑎᓯᐅᑎᒋᓯᒪᔭᕐᑎᓂ ᐊᒻᒪᓗ ᖃᐅᔨᓴᕐᓂᕆᓯᒪᔭᕐᑎᓂ. ᒪᓂᔨᐅᑎᕗᑦ ᕿᒥᕐᕈᓚᕆᑦᓯᒪᓂᑎᒍᑦ ᖃᐅᔨᓯᒪᔭᕐᑎᓂᒃ ᐱᓀᓗᑕᕐᓂᒃ ᖃᓄᐃᓕᖕᙰᓯᒪᓲᓂᒃ ᐃᓄᓐᓂᒃ ᐊᕐᓇᓂᒃ ᐊᒻᒪᓗ ᐃᓚᖏᓐᓂᒃ, ᐊᒻᒪᓗ ᐃᒣᓕᔭᐅᔪᑦᓴᐅᔫᓚᒋᑎᒋᓯᒪᔭᕐᑎᓂᒃ ᐊᒻᒪᓗ ᐃᑲᔪᕐᑎᓴᐅᑎᓗᒋᑦ ᓇᓗᓀᕐᓯᒪᔭᕐᑎᓂᒃ ᐃᓕᖓᓪᓚᕆᐅᑎᓕᓐᓄᑦ ᐆᑦᑑᑎᒋᑦᓱᒍ ᐃᕐᖃᑐᐃᕕᓕᕆᓂᖅ.
ᑖᒃᑯᐊ ᐃᓄᓐᓄᑦ ᑕᑯᔭᑦᓴᖑᕐᑎᓯᒪᔭᕗᑦ ᖃᐅᔨᑎᑦᓯᐅᑏᑦ ᑭᖕᖒᒪᔭᐅᓲᓂᒃ ᐃᓄᓐᓄᑦ ᐊᕐᓇᓄᑦ ᖃᓄᐃᓕᖕᖓᑕᐅᓯᒪᓗᑭᓲᓄᑦ ᐃᕐᖃᑐᐃᕕᓕᕆᓂᕐᓄᑦ, ᓱᓇᑦᓴᔭᐅᓂᖏᑦ ᐃᑉᐱᒋᑦᓱᒋᑦ ᐃᓓᓐᓈᑕᐅᒍᑎᒋᓲᖏᓐᓄᑦ ᓇᕐᕈᕆᔭᐅᔪᕐᑎᑐᑦ, ᐊᒻᒪᓗ ᐃᕐᓯᓇᕿᓂᕐᓄᑦ ᐱᒋᐊᖃᑦᑕᓂᕐᓄᑦ ᐱᓗᐊᕐᑐᒥᒃ ᑐᑭᓯᒪᔭᐅᑦᓯᐊᓂᕐᓴᐅᒋᐊᓕᓐᓄᑦ ᐊᒻᒪᓗ ᖃᓄᐃᓕᒍᑕᐅᒋᐊᖃᕐᑎᓗᒋᑦ ᑐᑭᓯᑎᑕᐅᓯᒪᒍᑎᑦᓄᑦ ᐃᓗᒡᒍᓯᖅ ᒪᓕᓪᓗᒍ ᐋᕐᕿᕕᓕᓐᓄᑦ ᑖᒃᑯᐊᑎᒍᓪᓗ ᖃᓄᐃᖕᖏᓯᐊᕐᓂᖏᑦᑕ ᐃᓚᒋᓕᒫᑦ ᐋᕐᕿᑕᐅᒍᓐᓇᓯᐊᕐᓂᖏᑦ ᑎᑭᐅᑎᔭᐅᓚᕿᑦᓯᐊᕈᓐᓇᓱᑎᒃ.
ᓂᕆᐅᑦᓯᐊᓂᖅ ᒪᓂᓗᒍ ᐊᒻᒪᓗ ᓄᓪᓚᖓᑦᓯᐊᓂᖅ ᐅᑎᕐᑎᓗᒍ
ᓄᓇᕕᓕᒫᒥ ᖃᐅᔨᓴᕐᓂᒧᑦ ᐱᓇᓱᒐᖅ ᐱᒋᐊᕐᑎᑕᐅᓯᒪᔪᖅ ᓴᑐᕐᕖᑯᓐᓄᑦ 2013-ᒥ ᑐᑭᓯᔭᐅᒋᐊᕐᑎᓗᒋᑦ ᑭᖕᖒᒪᒋᓲᖏᑦ ᐊᒻᒪᓗ ᐃᓱᒫᓘᑎᒋᓲᖏᑦ ᐃᓄᐃᑦ ᐊᕐᓀᑦ ᓄᓇᕕᒻᒥ. ᐊᕐᖁᑎᒋᑦᓱᒍ ᐱᓇᓱᐊᖃᑎᖃᑎᕐᓯᓂᐅᓯᒪᔪᖅ ᐃᓕᓴᕐᕕᔪᐊᑦ ᑐᑦᑕᕕᖓ ᓄᓇᓕᑐᖃᑦᓴᔭᓂᒃ ᖃᐅᔨᓴᕐᓂᓄᑦ ᐊᒻᒪᓗ ᐃᓕᓴᕐᓂᓄᑦ (CIERA) ᓚᕚᓪ ᐃᓕᓴᕐᕕᔪᐊᖓᓂ, ᐊᒻᒪᓗ ᑮᓇᐅᔭᖃᕐᑎᑕᐅᑦᓱᓂ ᐆᒧᖓ Community-Research University Alliance (CURA) ᑮᓇᐅᔭᕐᑖᑎᑦᓯᓯᒪᔪᑦ ᐊᑎᖃᕐᑎᓗᒍ ᓯᕗᓕᕐᑎᐅᓂᖅ ᐊᒻᒪᓗ ᐊᐅᓚᑦᓯᓂᖅ ᓄᓇᕗᒻᒥ ᐊᒻᒪᓗ ᓄᓇᕕᒻᒥ, ᓴᑐᕐᕖᑦ ᑲᔪᓯᑎᑦᓯᓯᒪᔪᑦ ᖃᐅᔨᓴᕐᓂᒥᒃ ᐱᒋᐊᕐᐸᓕᐊᑎᑦᓯᓱᑎᒃ ᐊᒻᒪᓗ ᑐᓴᕐᑎᓯᐅᑏᑦ ᓄᐃᑕᐅᑎᑦᓱᒋᑦ ᓇᓗᓀᕐᓯᐅᑕᐅᑦᓱᑎᒃ ᐃᓱᒫᓘᑕᐅᓪᓚᕆᓲᓂᒃ ᐊᒻᒪᓗ ᒪᓂᑦᓱᒋᑦ ᐃᒣᖁᔨᐅᑎᑕᖏᑦ ᐱᐅᓯᐅᒥᔭᐅᒋᐊᕈᑎᐅᓚᖓᔪᓄᑦ ᐃᓄᐃᑦ ᐊᕐᓀᑦ ᐃᓅᓯᖏᓐᓂᒃ
ᑐᓴᕐᑎᓯᐅᑏᑦ ᖃᐅᔨᒐᓱᐊᕐᑕᐅᓂᖏᓐᓄᑦ ᐊᓯᐅᖏᓐᓇᐸᑦᑐᑦ ᐊᒻᒪᓗ ᐃᓄᐊᕐᑕᐅᕙᑦᑐᓄᑦ ᓄᓇᕕᒻᒥᐅᓄᑦ
ᑖᒃᑯᐊ ᑐᓴᕐᑎᓯᐅᑏᑦ ᑕᑯᑦᓴᐅᑎᑦᓯᔪᑦ ᖃᓄᐃᓕᒍᑕᐅᓯᒪᓂᖏᓐᓂᒃ ᖃᐅᔨᒐᓱᐊᕐᓃᑦ 2016-ᒥ ᐱᒋᐊᕐᑎᑕᕕᓂᐅᑦᓱᑎᒃ ᓴᑐᕐᕖᑦ ᐃᓄᐃᑦ ᐊᕐᓀᑦ ᑲᑐᑦᔨᖃᑎᒌᓐᓂᖓᓄᑦ ᓄᓇᕕᒻᒥ, ᐱᔭᐅᕉᑕᕆᑎᓪᓗᒋᑦ ᑳᑕᓇᓕᒫᒥ ᖃᓄᐃᓕᒋᐊᕈᑎᖃᕐᓃᑦ ᑲᔪᓯᑎᑦᓯᒋᐊᕐᓂᓂᒃ ᖃᐅᔨᓴᕐᑕᐅᖁᔨᓂᕐᓄᑦ ᐊᓯᐅᖏᓐᓇᐸᑦᑐᓂᒃ ᐊᒻᒪᓗ ᐃᓄᐊᕐᑕᐅᕙᑦᑐᑦ ᓄᓇᖃᕐᖄᑐᕕᓂᕐᓂᒃ ᐊᕐᓇᓂᒃ ᐊᒻᒪᓗ ᐸᓃᑦ ᑳᓇᑕᒥ. ᑐᕌᒐᐅᓚᐅᔪᖅ ᓇᓗᓀᕐᓯᓂᖅ ᖃᓄᐃᓕᖓᐅᑎᒋᔭᐅᓲᓂᒃ ᓄᓇᕕᒻᒥ, ᓂᐱᖃᕐᑎᑕᐅᒍᑎᒋᒋᐊᓕᖏᓐᓂ ᐃᓚᖏᑦᑕ ᐱᖁᔦᑦ ᓯᖁᒥᑦᓱᒋᑦ ᐱᓂᕐᓗᕕᐅᕙᑦᑐᑦ ᐊᒻᒪᓗ ᑐᓂᔨᕕᒍᓐᓇᓯᓗᒋᑦ ᑭᖕᖒᒪᒍᓲᖏᓐᓂᒃ.
ᐃᕐᖃᑐᐃᕕᓕᕆᓂᖅ ᓄᓇᕕᒻᒥ ᓄᓇᓕᓐᓂ
ᐊᑐᐊᒑᐲᑦ ᐃᕐᖃᑐᐃᕕᓕᕆᓂᖅ ᓄᓇᕕᒻᒥ ᓄᓇᓕᓐᓂ ᓄᐃᑕᐅᓯᒪᔪᑦ 2018-ᒥ, ᒪᓂᔨᒍᑕᐅᒋᐊᕐᓯᒪᔪᑦ ᑐᑭᓯᑎᑦᓯᒋᐊᕐᓂᒥᒃ ᐃᕐᖃᑐᐃᕕᓕᕆᓂᐅᑉ ᑐᑭᖓᓂᒃ ᓄᓇᕕᒻᒥ, ᒪᓂᔨᕕᒋᑦᓱᒋᑦ ᐃᓄᐃᑦ ᐃᓱᒪᒋᔭᖏᓐᓂᒃ ᐃᓅᖃᑎᒌᓐᓂᒥ ᓭᒪᐅᑎᓂᕐᓄᑦ ᐊᒻᒪᓗ ᐃᑲᔪᕐᑎᓴᓂᒃ ᐋᕐᕿᑕᐅᒍᑎᒋᓲᖏᓐᓂᒃ ᓈᒻᒪᒋᐅᑎᖕᖏᓃᑦ ᐃᕐᖃᑐᐃᕕᓕᕆᓂᕐᓄᐊᖓᑦᓱᑎᒃ ᐃᑲᔪᕐᑎᓭᑦ. ᐱᑦᔪᑎᖓ ᑖᒃᑯᐊ ᑕᑯᔭᑦᓴᖑᕐᑎᑕᐅᓯᒪᓂᖏᑦᑕ ᐃᑲᔪᕐᓯᒋᐊᕐᓂᖅ ᐊᕐᓇᓂᒃ ᑐᑭᓯᒪᑦᓯᐊᓂᕐᓴᐅᖁᑦᓱᒋᑦ ᐃᕐᖃᑐᐃᕕᓕᕆᓂᐅᑉ ᐋᕐᕿᓱᕐᓯᒪᐅᑎᖏᓐᓂᒃ. ᐱᑦᔪᑎᖏᑦ ᐃᓄᓐᓂᒃ ᑕᑯᔭᑦᓴᖑᕐᑎᓯᐅᑏᑦ ᐃᑲᔪᕐᓯᔭᐅᒍᓐᓇᓂᖏᑦ ᐊᕐᓀᑦ ᐱᔪᓐᓇᕆᐊᖏᑎᒍᑦ ᐃᒻᒥᓂᒃ ᐊᐅᓚᑦᓯᒍᓐᓇᓂᖃᕈᓐᓇᓗᑎᒃ ᐊᒻᒪᓗ ᓄᐃᑕᑎᑦᓯᒍᓐᓇᓂᖏᓐᓂᒃ ᓭᒪᐅᑎᓂᕐᒥᒃ ᐃᓚᒥᓂ ᐊᒻᒪᓗ ᓄᓇᓕᒥᓂ.